Бұлшық еттері бұлтылдап, кәсіпқой спортшыдай тотами төрінде өнер көрсетіп, қарсыластарынан күші мен айласы басым түсіп, жеңіс тұғырынан көрініп жүрген ағайынды қос жігіт Ералы мен Әділет – қандай мақтауға да лайық талантты спортшылар. Жас болса да талай белестерді бағындырып жүрген қос өреннің үлкені Ералы Үмбетқалиұлы 2008 жылдың 13 наурызында, Үмбетқалиұлы Әділет 2013 жылдың 28 наурызында Батыс Қазақстан облысы, Орал қаласында дүниеге келді. Жайықтың жарқын жүзі келбетіне әр берген қалада ержетіп келе жатқан Ералы №7 «Айналайын» балабақшасында, Әділет №35 «Шұғыла» балабақшасында тәрбиеленіп, №34 мектеп-гимназиясының табалдырығын аттады. Асқар тау әкелері Қажығалиев Үмбетқали – Полиция  департаменті, жол патрулдік қызметінде аға испектор болып қызмет атқарса, шуағы мен шапағаты мол аяулы анасы Қажығалиева Нұргүл – 15 жылға жуық әлеуметтік салада еңбек етіп жүрген мемлекеттік қызметкер. Ойнаса да бірге ойнап, жаттығу залына да бірге барып, спорттық сайысқа да бірге қатысып жүрген жұбы жазылмас спортшылардың Әли есімді бауыры бар. Үлкеннің көңілін қалдырмайтын әдепті де, еңбекқор ұландар – ата-аналарының үлкен үміті. Доп тебуге, күресуге деген қызығушылығы, таэквондо спортына алып келген қос шәкірт БҚО бойынша ИТФ таэквондо Федерациясының президенті Ахметов Аралбек Сайынұлының командасында жаттығады. Тәжірибелі де, білікті бапкерден тәлім алып, қабілеттерін шыңдап жүрген Ералы мен Әділеттің келешекте толайым табыстарға жететініне сенімдіміз.

      Ералының жетістігі: 2018 жылы қаланың клубтық Ашық турнирінде +30 кг салмақ дәрежесінде I орын, 2019 жылы Таэквондодан «RODCHENKO TEAM» клубының жүлдесі үшін 11-12 жас аралығындағы жасөспірімдер арасында өткізілген I Ашық турнирден III орын, ИТФ таэквон-додан «AKTOBE OPEN» Ақтөбе қаласының 150 жылдық мерейтойы қарсаңында өткізілген Халықаралық турнирден «Спарринг мальчики» бағдарламасы бойынша және ITF таэквондодан Ақтөбе облысының Ашық чемпионатында «Спарринг» бағдарламасы бойынша II орын алған жүлдегер. 2019 жылы Орал қаласында ITF таэквон-додан өткізілген қалалық Ашық турнирден +30 кг салмақ дәрежесінде «Масочи» бағдарламасы бойынша III орын, 2019 жылы ITF таэквон-додан өткізілген  қалалық Ашық турнирінен III дәрежелі Диплом иемденді. 2020 жылы Таеэквондодан ИТФ-тен балалар, жасөспірімдер, кадеттер және жастар арасындағы «ORAL OPEN» Ашық Республикалық турнирінде +36 кг салмақ дәрежесінде III орынға ие болып, мерейі үстем болды.
      Сүйікті ісі: Футбол ойнау, ағылшын тіліндегі кітаптарды оқу.
      Арманы: Жоғары білім алып, IT бағдарламашысы болу.
 
      Әділеттің жетістігі:  ITF таэквондодан Ақтөбе облысының Ашық чемпионатында «Спарринг» бағдарламасы бойынша I орын, 2019 жылы Орал қаласында ITF таэквон-додан өткізілген қалалық Ашық турнирден +20 кг салмақ дәрежесінде II орын, ITF таэквон-додан өткізілген  қалалық Ашық турнирінен +25 кг салмақ дәрежесі бойынша жүлделі I орын жеңімпазы. 2020 жылы Таэквондодан ИТФ-тен балалар, жасөспірімдер, кадеттер және жастар арасындағы «ORAL OPEN» Республикалық турнирінде +20 кг салмақ дәрежесінде I орынды жеңіп алып, жетістіктің даңғыл жолына шықты.
      Сүйікті ісі: Спортпен шұғылдану, достарымен бас қосу, отбасына көмектесу.
      Арманы: Спортта жетістікке жетіп, Олимп шыңдарын бағындырған Чемпионы болу.