Киелі сахна төріне шығып ән салғанда тыңдарманын еріксіз баурап алатын күміс көмей әншілік өнері бар талантты ұл Мирас Джамбулұлы 2009 жылдың 20 желтоқсанында Түркістан облысы, Шымкент қаласында дүниеге келді. Жас болса да талай белесті бағындырып, көрермендердің көзайымына айналып үлгерген Мирас тәлім-тәрбиесінің бастауын «Балдырған» балабақшасында алып, бүгінде М.Ломоносов атындағы мектепте білімін жетілдіріп, біліктілігін шыңдап келеді. «Сөзі алтын атасы Еңсегеннің ерке баласы болып өссе де, бүгінде өзгелерге үлгі боларлық тәртібі, үлкенге құрметі бөлек, кішіге ізеті бар алтын асықтай ұл. Әрдайым қамқоршы болып, қолдап жүретін әкесі Жамбул Еңсегенұлы саялы бәйтерегі болса, сезімі ыстық, жібек мінезді анасы Нұрсұлу Орақбайқызы шәкірт тәрбиелеп жүрген ұстаз. Шаңырақ дейтін саялы бәйтеректің түбінде бірге ойнап, бір күліп, бақыт әнін бірге шырқап келе жатқан Жоламан, Жанар, Үмітай, Мақсат, Диас есімді бауырлары бар. Балабақшада өнерлі балалар қатарында болып, тәрбиешілерін тамсандырған Мирас, мектеп табалдырығын аттағаннан кейін де озат оқушылардың көшін бастады. Сабаққа әркез үлкен дайындықпен келіп, тек 5 деген баға алып отырды. Сыныпішілік, мектепішілік өткізілген пән сайыстары мен интеллектуалды жарыстарға, интернет арқылы қашықтықтан өткізілген марафондар мен олимпиадаларға қатысып жүлдемен оралып келеді. Ұйымдастырушылық қабілеті бар, ашық мінезді Мирас сабақтан тыс уақыттары өнер мектебіне барып, ән айтып домбыра үйреніп келеді. Жеткен жетістіктері де жоқ емес, 10-нан астам ән жинағы бар және 5-6 күйді домбыраға салып тартқанда қол соғудан басқа амалың қалмайды. Жүрегіне адалдықтың ізгілігін себелеп, жүзінде мейірім нұры ұялаған оқушының бағындырар белестері мен алар асулары әлі алда. 
      Жетістігі: «Рухани жаңғыру» бағдарламасы аясында «Білім шыңы» қоғамдық бірлестігі мен ОҚО «Жас Ұлан» бірыңғай балалар мен жасөспірімдер ұйымының ұйымдастырумен өткізілген Оңтүстік Қазақстан облысы оқушыларының «Алтын ұрпақ» зияткерлік олимпиадасына белсене қатысқаны үшін Сертификат иегері. М.Ломоносов атындағы мектеп-гимназиясының бастауыш сыныптар арасында өткізілген «Алтын күз» атты апталығында «Ғажайып суреттер» сурет көрмесінен «Көркем сурет» номинациясы бойынша Мадақтама және «Күзгі Ханшайым мен Ханзада» өнер сайысынан III орын алған. 19 қараша мен 23 қараша аралығында «Түлкібасым – құт мекенім!» тақырыбында өткізілген бастауыш сынып апталығында «Менің сүйікті ертегім» атты сурет көрмесіне белсене қатысып, ат салысқаны үшін Алғыс хат иемденген. 2019 жылы Тараз қаласында өткізілген Жамбыл облысының 80 жылдық мерейтойы аясында ұйымдастырылған «SILK WAY STARS» I Халықаралық балалар мен жастардың шығармашылық байқауына «Вокал» номинациясы бойынша I орын, 2019 жылы «SUN OF TALANTS» I Халықаралық балалар мен жасөспірімдердің шығармашылық байқауынан I орын алған жүлдегер.
      Сүйікті ісі: Ән айту, домбыра тарту, сурет салу, музыка тыңдау.
      Арманы: Өнер әлемінің жұлдызы, атақты әнші болу.