Көңіл-күйдің ажарын кіргізер ән айтып, саусағы бүгіле іс тоқып, қолөнермен айналысып, моделдік өнерімен қатар актерлік шеберлігін шыңдап жүрген өнерлі жас Аружан Искандерқызы 2009 жылдың 11 ақпанында әсем ғимараттары көз тартқан сұлу қала елордада дүниеге келді. Өнер майталмандары шоғырланған өлкеде балдан да тәтті балалығын өткізіп, балабақша қабырғасында тәрбиелене жүріп бойындағы қабілетін аша түсті. Ата-анасының ғана емес, сыныптастары мен мектебінің мақтанышына айналып, үлкен додаларда жеңіске жетіп жүрген Аружан – Нұр-Сұлтан қаласындағы Жамбыл Жабаев атындағы №4 мектеп-гимназиясының 5 «А» сынып оқушысы. Қамқор, мейірбан әкесі Момынбеков Искандер спорт саласына еңбек сіңіріп бапкерлікпен айналысса, ақылына ажары сай анасы Момынбекова Дания – жеке кәсіпкер. Жас болса да киелі сахнаның баспалдағына аяқ салып үлгерген талантты қыздың 2-сыныпта оқитын Айсана атты сіңілісі бар. Сабақты өте жақсы оқып, мақтауға лайықты оқушылардың сапында болып,  сыныпішілік, мектепішілік өткізілген пән олимпиадалары мен өзге де білім сайыстарына белсене қатысып, білімділігі мен біліктілігін дәлелдеп келеді. Сабақтан тыс уақытында өнер үйірмелеріне қатысып, анасының қолғанатына айналды. Заман талабына сай шет тілдерін меңгеру үшін көп еңбектенуде. «Ай плюс» орталығында білімін жетілдіріп жүрген Аружан Назарбаев Зияткерлік мектебі мен Білім-Инновация лицейіне қабылдануға дайындық үстінде. Бес жыл заманауи және эстрадалық би үйірмелерінде қабілетін шыңдап, «Радуга» би тобында өнер көрсетуде. Мектепішілік өткізілген мерекелік қойылымдарда образға кіріп кететін, өзіне берілген кейіпкер рөлін үздік сомдап шығатын актерлік қабілеті де бар. «Kids Fashion» атты модельдік мектепті бітіріп, сән көрсетушісі ретінде түрлі көрсетілімдерге қатысып келеді. Кинокастингтерге, би өнерінің сайыстарына қатысып бақ сынап, шеберлігін шыңдап жүрген өнерпаз оқушы Аружанның қазақ киносы әлемінде, өміршең өнерде өз өрнын табатынына сенімдіміз.
      Жетістігі: 2017 жылы «Ең үздік шырша» байқауынан Диплом, «Выход есть» сайысынан Грамота, «ПОНИ» Халықаралық байқауынан Сертификат иемденген. Өресі биік өрен «Мектеп аруы» мектепішілік өткізілген арулар байқауының жеңімпазы атанып, мерейі үстем болды. «Мастер сцены» сайысынан I орын, «Masic Fese» жарысынан I орын, «Astana Cup – 2019» байқауынан I орын алған жүлдегер шәкірт. «Осенний олимп» пән олимпиадасынан I орын алып, «New Tone Education» «British Dog», «Urfodu», «Kids Fashion» байқауларының жеңімпазы атанған талантты жас. Би байқауларының бірнеше дүркін Гран-При жүлдегері. Руханиятқа жақын Аружан мектепішілік «Қыздар – көктем гүлі» шығармашылық сайысынан I орын және «Тілім менің – тірлігімнің айғағы» байқауынан I орын алып, жүлдегер атанып, марапаттарын еселей түсті. «Кенгуру – математика для всех» Халықаралық байқауынан III орын алса, «Зерделі тұлға», «Розы Казахстана», «Отчетный концерт», «Білген бәйге» байқауларынан жүлделі I және II орын иемденген білімпаз оқушы. 2019 жылы ағылшын тілі пәні бойынша өткізілген «BRITISH BULLDOG» Халықаралық байқауынан I дәрежелі Диплом иемденіп, «Арт культура» сайысынан және «Розы России» байқауынан III орын жүлдегері.
      Сүйікті ісі: Би билеу, ән салу, кітап оқу, түрлі дизайн үлгілерін жасау.
      Арманы: Кино әлемінің жұлдызы, атақты актриса болу.