Туған жерінің әр атқан күнін бақытына балайтын зерделі өрен Аққұбаш Диас жер асты қазынаға толы Маңғыстау облысы, Қарақия ауданы, Мұнайшы кентінде 2005  жылы 20 тамызда мерейлі отбасында дүниеге келген. Диас – ата-анасының қолғанаты, көзқуанышы мен ақ үміті. Еңбегімен елге сыйлы құрметті әкесі Болғанбаев Жұмабек Аққұбашұлы – «Вестойл» мекемесінде жүргізуші. Перзенттерін аналық махаббатымен аялап, бар жақсыны беруді мақсат еткен асылзат анасы Сисекенова Меруерт  Мизимбайқызы – «Маңғыстаумұнайгаз» саласының операторы қызметінде. Өте бауырмал, көпшіл, ақ пейілді, тілалғыш Диастың алдында үлгі тұтар ағалары: Еркин мен Ануар бар. Үлкен ағасы Болғанбаев Еркин – оператор болса, кіші ағасы Аққұбашов Ануар – қаржыгер қызметінде. «Балауса» балабақшасына барып, көп нәрсені үйреніп, жақсы мен жаманды ажырата бастады. «Білім алудың тамыры ащы, бірақ жемісі тәтті» дегендей, қазіргі кезде алғыр ұлан Мұнайшы аулындағы №7 орта мектебінің  9 «Ә» сыныбында білім алуда. Кітап ішкі жан дүниеңнің, ой қабілетіңнің қалыптасуына, өмірдегі болмысыңа әсер етеді деген пікірдегі Диас бос уақытын кітап оқуға арнайды. Сүйіп оқитын ақындарының бірі – М.Шаханов. Жігерлі жеткіншек мектептегі барлық іс-шараларға белсене қатысып, жақсы қырынан танылып жүр. Ұлағатты ұлан футбол спортымен кішкентайынан айналысады.
      Жетістігі: Ойы ұшқыр, қиялы жүйрік Диас – оқу озаты, әр оқу жылын Мақтау қағаздарымен бітіріп жүрген сынып мақтанышы. Мектепішілік, аудандық, облыстық білім бәйгелері мен зияткерләк сайыстардың, спорттық жарыстардың жүлдегері. «Серікбол әлемі» І және ІІІ дәрежелі Диплом иегері. «Әдепті бала, инабатты қыз» сайысында ерекшеленіп, ІІІ орынмен Диплом иегері атанды. Білімпаз шәкірт Аққұбаш Диастың ата-анасына мектеп ұжымының атынан Алғыс хат табыс етілді. НГ «Энергетик» балалар сауқтыру мекемесінің «Үміт және тірек» номинациясы бойынша Мадақтама иемденді. . «Қазақстан ұстаздары» қоғамымен ұйымдастырылған Орыс тілі пәні бойынша Республикалық Қашықтық Олимпиадаға қатысып, жоғары көрсеткіштерді иеленгені үшін ІІ орынмен Диплом иегері атанды. Диастың әлі де талай жеңістерге жететіні хақ.
      Сүйікті ісі: Футбол ойнау, өз ойларын ақ қағаз бетінде өрнектеу, табиғат аясында серуендеу, білімін жетілдіру, ата-анасына көмектесу.
      Арманы: Туған жері мен туған ұлтына адал қызмет етуді мақсатына айналдырған зерек ойлы ұлан болашақта көкте қалықтар ұшқыш болуды армандайды.