Алаштың айбынды астанасы Бәйтерегімен аспанмен астасып тұр. Әрбір перзенттің табиғатқа сай дүниетанымы қалыптасады емес пе?! Елордалық Ернар Астанадай әсемдікке жаны құмар, бойы көркемдікпен үйлескен, рухани дүниесі бай азамат болып өсіп келеді. Өйткені, оған шабыт беріп, қуаттайтын да, жан дүниесін шуақтайтын да – Астана! 
      Туған жері – Астана,
      Ел ордамыз бас қала.
      Сол қаланың перзенті,
      Ұқсамайды басқаға.
      Иә, Ернар – болмысы бөлек балдырған. Өзгелерден ерек. Арайын төккен абат мекеннің құнары бойына дарыған дарын иесі. Ол білімнен де, спорттан да қатарластарынан оқ бойы озып тұр.      Сардар Ернар Арайұлы  2004 жылдың  7 қыркүйегінде Астана қаласында дүние есігін ашқан. Асқар тау әкесі Тубекбаев Арай Сардарұлы – Қостанай облысы, Арқалық қаласының тумасы. «Казаэронавигация» РГП мекемесінде жүргізуші боп еңбек етеді. Арқалықтың аруы, анасы Оразбаева Роза Өмірзаққызы – аталған мекемеде  телеграфист-радиооператор болып қызмет етеді. Үйдің тұңғышы боп жарық дүниеге қадам басқан айдарлы ұлдың артынан ерген екі інісі және қарындасы бар. Сардар Ерсұлтан Арайұлы, Сардар Арлан Арайұлы мен Сардар Аяла Арайқызы алдыңғы буын ағасынан үлгі алып, ізін басып келеді. 
      Ернар алдына үлкен мақсат қоя біледі. Болашақта мол білім алып, өзінің біліктілігін дәлелдеп, Еуропа төрінде әлемдік деңгейде азуын айға білеген алпауыт оқу ордаларында білім алсам дейді. Осы күннің өзінде ол алғашқы қадамдарды нық басып келеді. Білім бәйгесінде қатарынан оза шапқан оғлан. Инженер-конструктор болып, елге қызмет етуді қалаған арманшыл  жас Қазақ елінің шоқтығын биіктетіп, заманауи технологияларды өндіріске енгізе отырып, саласының білікті маманы болуды көздейді. «Бәрекелді!» демегенде, қайтпексіз?!
      Қаламы жүйрік өрен мектепшілік  «Қазақ тілі – анам тілі, өз тілім» атты эссе жазу сайысында туған тіліне деген толғанысын жүрек түкпіріндегі әсем сөздерге сыйдыра біліп, ІІ орынды еншіледі. Бұл – ол шыққан шыңдардың басы ғана. Төртінші сыныпта бүкілресейлік «Человек и природа» конкурсында сертификат иеленді. Есептен есе жібермейтіні бар. Математика пәнінен өткізілген сайыс сабақта сарбаз алғырлығымен көзге түскені үшін, марапат биігінен көрінді. Спортты да назардан тыс қалдырмай, ұзындыққа секіруден сергек ұл І орынның биігін бағындырды. Сондай-ақ, «Динамо» кешенінің ұйымдастыруымен өткен ұлдар және қыздар арасындағы суда жүзу сайысынан топ жарып, қарсыластарын шаң қаптырып, І орынды қанжығасына байлады. «Көшбасшы – 2014» сайысында «Алғыр» номинациясын, «Кітап немесе компьютер: қайсысын таңдайсың?» дебат сайысында «Ең үздік сарапшы» номинацияларын иемденді. Мұнан бөлек, «Зерек» олимпиадасында, «Ақбота», «Кенгуру» сайыстарында жүлделі оралып жүр.
      2017 жылы Алматы қаласында ұйымдастырылған «Қазақстан Білім Олимпиадасына» қатысқан озық ойлы шәкірт арнайы сертификатты еншіледі. Жалпы білім беретін пәндер бойынша республикалық олимпиаданың екінші кезеңінде физика пәні бойынша топ жарған ол ұстазымен қоса жүлдегер атанып, білім саласы басшылығының алғысын иеленді. «Білім-Инновация»  халықаралық қорының ұйымдастыруымен өткен бұл аламанда Ернар ІІ орынды еншісіне алды. Дәл осы сайыстан бір жылдан соң, ІІІ орынға қол жеткізіп, марапат мінберіне шықты.
      Тек сайыстарда ғана емес, түрлі шараларда, мектептің қоғамдық өміріне белсене атсалысатын арлан  «Өркениеттің бастауы – білімді ұрпақта» атты оқушылар слетінде жан-жақты таланты мен белсенділігі үшін, ұйымдастырушылардың алғыс хатымен марапатталды. Оның белсенділігін лицей басшылығы ескерусіз қалдырмады. 2018 жылы ол «Лицей жұлдызы» номинациясымен марапатталды. 
      Ғылым жолына да өзіндік із қалыптастыруды мақсат еткен жалынды жас Қ.Сәтбаев атындағы VІІІ  халықаралық олимпиадада  сертификат иеленді. Мұнан өзге білім бәйгелерінде сан мәрте топ жарған талант қашан да алдыңғы қатардан көрініп, іні-қарындастарына үлгі-өнеге болып жүр.
      Спортта да жетістік желкенін керген жеткіншек бос уақытында футбол, баскетбол ойнағанды ұнатады. Қолы қалт еткенде, физика пәні бойынша өзіндік жұмыстармен айналысуды да ұмыт қалдырған емес.
      Жетістіктер аралының капитанына алар бағытың жарық болсын дейміз!